2001 жылғы 12 қарашада АҚШ-тың Нью-Йорк қаласында ірі әуе апаты болды. American Airlines әуе компаниясына тиесілі Airbus A300 жолаушылар ұшағы ұшып шыққаннан кейін бірнеше минуттан соң апатқа ұшырап, Куинс ауданындағы тұрғын үйлердің үстіне құлады. Салдарынан борттағы 260 адам мен жерде болған бес тұрғын қаза тапты, деп хабарлайды buginmedia.kz.
Ұшақ Нью-Йорктегі Джон Кеннеди атындағы халықаралық әуежайдан Доминикан Республикасының астанасы Санто-Домингоға бағыт алған. Бортта 251 жолаушы мен тоғыз экипаж мүшесі болған.
Лайнер жергілікті уақыт бойынша таңғы сағат 9:14 шамасында әуеге көтерілген. Алайда бірнеше минуттан кейін оның экипажы алдында ұшып шыққан Japan Airlines компаниясының Boeing 747 ұшағынан қалған турбулентті ауа ағынына тап болған.
Осыдан кейін екінші ұшқыш әуе кемесінің бағытын тұрақтандыру үшін рульді бірнеше рет қатты бұрған. Соның салдарынан ұшақтың тік тұрақтандырғышына шамадан тыс күш түсіп, құйрық бөлігі үзіліп кеткен. Басқарудан айырылған лайнер тұрғын үйлер орналасқан Бель-Харбор ауданына құлаған.
Соққыдан кейін ұшақтың қозғалтқыштары да бөлініп, оқиға орнында өрт шыққан. Құтқарушылар мен өрт сөндірушілер дереу жеткенімен, борттағы адамдардың ешқайсысы аман қалмаған. Бұдан бөлек, жерде болған бес адам да қаза тапты. Жалпы құрбандар саны 265-ке жетті.
Апаттан кейін АҚШ-тың Ұлттық көлік қауіпсіздігі кеңесі бірнеше жыл бойы тергеу жүргізді. 2004 жылы жарияланған қорытынды есепте апатқа екінші ұшқыштың рульді шамадан тыс басқаруы себеп болғаны айтылды. Сонымен бірге тергеушілер Airbus A300 ұшағының басқару жүйесіндегі ерекшеліктер мен American Airlines компаниясындағы ұшқыштарды даярлау бағдарламасының кемшіліктерін де атап өтті.
Қайғылы оқиға құрбандарын еске алу үшін Нью-Йорктің Рокавей ауданында мемориал орнатылған. Онда қаза тапқан 265 адамның есімі жазылған. Жыл сайын 12 қарашада марқұмдарды еске алу рәсімі өтеді.
Арада 25 жыл өтсе де, бұл апат АҚШ азаматтық авиациясы тарихындағы ең ауыр қайғылы оқиғалардың бірі болып қалды.
