2004 жылғы 3 қаңтарда Мысырдың Шарм-эш-Шейх қаласынан ұшып шыққан жолаушылар ұшағы Қызыл теңізге құлаған. Апат салдарынан борттағы 148 адамның барлығы қаза тапты. Олардың арасында 135 жолаушы мен 13 экипаж мүшесі болған, деп хабарлайды buginmedia.kz.
Апатқа ұшыраған Boeing 737-300 ұшағы Flash Airlines әуе компаниясына тиесілі еді. Ол FSH604 чартерлік рейсімен Шарм-эш-Шейх – Каир – Париж бағыты бойынша ұшқан. Жолаушылардың басым бөлігі Мысырда демалып, Францияға қайтып бара жатқан туристер болған.
Ұшақ әуеге көтерілгеннен кейін шамамен екі жарым минут өткенде апатқа ұшыраған. Әуелі биіктікке көтеріле бастаған әуе кемесі оң жаққа қарай қатты қисайып, артынша биіктігін тез жоғалтқан. Сөйтіп жағалаудан шамамен 15 шақырым қашықтықтағы теңізге құлаған. Аман қалғандар болмаған.
Апаттың себебі толық анықталмады
Құтқару және іздестіру топтары ұшақ құлаған аумақты тексеруге кіріскен. Әуе кемесі суға соғылған кезде бірнеше бөлікке бөлініп, сынықтарының басым бөлігі теңіздің терең түбіне кеткен.
Тергеушілер үшін ұшақтың қара жәшіктерін табу маңызды болды. Ұшу параметрлерін тіркейтін құрылғы 2004 жылғы 16 қаңтарда, ал экипаждың әңгімесін жазатын екінші құрылғы келесі күні табылған. Оларды Мысыр мамандары Франция мен АҚШ сарапшыларының қатысуымен зерттеген.
Алғашқы кезде техникалық ақау мен теракт нұсқалары қарастырылған. Алайда тергеу барысында әуе кемесіне қасақана шабуыл жасалды деген болжам жоққа шығарылған. Қозғалтқыштардың істен шыққаны немесе ұшақ құрылымының ауада бұзылғаны туралы да дәлел табылмаған.
2006 жылы жарияланған Мысырдың қорытынды есебінде апаттың нақты себебі біржақты анықталмаған. Ал Франция мен АҚШ мамандары ұшқыштардың кеңістікте бағдарынан жаңылуы апатқа әсер етуі мүмкін деген тұжырым жасаған.
Түнгі уақытта ұшқан кезде пилоттар ұшақтың көкжиекке қатысты қалпын дұрыс бағалай алмай, оның бағыты мен еңкеюін қате түсінуі мүмкін.
Осылайша, апаттың нақты себебі жөнінде тергеуге қатысқан барлық тарап ортақ қорытындыға келе алмаған.
