Nvidia компаниясының бұрынғы басшысы Дженсен Хуангтың жеке өміріне қатысты жаңа ақпарат жарияланды. Reuters агенттігінің хабарлауынша, миллиардердің компанияның тағы бір қызметкерімен көңіл жарастырғаны туралы мәлімет пайда болды. Осылайша, оның некеден тыс қарым-қатынаста болған болуы мүмкін әйелдердің саны үшеуге жетті, деп хабарлайды buginmedia.kz.
Агенттік бұл ақпаратты жағдайдан хабардар екі дереккөзге сүйеніп таратқан. Алайда үшінші әйелдің аты-жөні жарияланған жоқ. Журналистер онымен байланыс орната алмаған. Дженсен Хуанг пен Nvidia өкілдері де Reuters сауалына жауап бермеген.
Бұған дейін миллиардердің есімі тағы екі әйелмен байланысты аталған еді. Алғашқысы – Сингапурдағы Megaspeed компаниясының басшыларының бірі болған Элис Хуанг. АҚШ арнайы қызметтері оны Қытай барлау қызметімен байланысы болуы мүмкін деп күдіктенген. Алайда бұл айыптаулар тәуелсіз түрде расталған жоқ.
Екінші әйел – Nvidia компаниясының денсаулық сақтау бағыты бойынша вице-президенті Кимберли Пауэлл. The New York Times басылымы олардың арасында романтикалық қарым-қатынас болғаны туралы жазған. Пауэлл Хуангқа тікелей бағынышты қызмет атқарған.
8 қарашада Дженсен Хуанг отбасына опасыздық жасағанын көпшілік алдында мойындап, әйелі мен балалары және компания қызметкерлерінен кешірім сұраған болатын.
Ал 12 қарашада Nvidia компаниясы оның бас директор, президент және директорлар кеңесінің мүшесі қызметтерінен кеткенін хабарлады. Уақытша басшылық қаржы директоры Колетт Кресске тапсырылды.
Айта кетейік, Дженсен Хуанг Nvidia компаниясын 1993 жылы құрған. Ол компанияны отыз жылдан астам уақыт басқарды. Бүгінде Nvidia жасанды интеллект технологияларына арналған чип өндіретін әлемдегі жетекші компаниялардың бірі саналады.
