Түркияның туристер көп баратын Каппадокия аймағында ерекше жартас түзілісінің бір бөлігі опырылып құлап, үш адам қаза тапты. Марқұмдардың екеуі – төрт ай бұрын шаңырақ көтерген ерлі-зайыпты. Тағы бес адам жарақат алды. Олардың арасында үш француз азаматы бар. Бұл туралы Associated Press (AP) және түркиялық ақпарат агенттіктері хабарлады, деп хабарлайды buginmedia.kz.
Оқиға 2026 жылғы 29 қазанда Невшехир провинциясындағы Гөреме елді мекенінде болған. Жартас Гөреме ашық аспан астындағы музейдің кіреберісіне жақын жерде құлаған. Куәгерлердің хабарынан кейін оқиға орнына төтенше жағдай қызметі, жедел жәрдем, полиция, жандармерия және құтқару топтары жіберілген.
Алдын ала мәлімет бойынша, жартас сынықтары сол маңда жүрген адамдардың үстіне құлаған. Құтқарушылар үйінді астында қалғандарды іздестіріп, зардап шеккендерді ауруханаға жеткізген.
Қаза тапқандардың арасында төрт ай бұрын үйленген жұп бар
Кейін апаттан қаза тапқандардың жеке басы анықталды. Марқұмдардың екеуі – Түркияның Сакарья провинциясынан барған 31 жастағы журналист Фатих Эрай Туна мен оның жұбайы Бегүм Четинкая Туна.
Фатих Эрай Туна жергілікті басылымдардың бірінде тілші болып жұмыс істеген. Ал жұбайы Бегүм бухгалтер қызметін атқарған. Ерлі-зайыптылар 2026 жылғы 5 шілдеде үйленген. Олар Каппадокияға демалып, саяхаттау үшін барған.
Үшінші марқұм – 37 жастағы Франция азаматы Синтия Франсин Мари Мадлен Упер. Оның да жартас сынықтарының астында қалғаны анықталды.
Жас жұбайлардың қазасы туған-туыстары мен Сакарьядағы журналистер қауымдастығы үшін ауыр қайғы болды. Марқұмдардың мәйіті сот-медициналық сараптамадан кейін отбасыларына тапсырылған. Оларды туған жері Сакарьяда жерлеу жоспарланған.
Бұл туралы Demirören Haber Ajansı (DHA) және Cumhuriyet басылымдары жазды.
Бес адам жарақат алды
Оқиға салдарынан бес адам жарақат алған. Олардың үшеуі – Франция азаматтары: 38 жастағы Мхемед Мгаттаф, оның сегіз жастағы ұлы Наэль және үш жастағы баласы Исаак Исмаэль. Сондай-ақ Түркия азаматтары, 32 жастағы Өндер Демир мен 29 жастағы Гүл Демир зардап шеккен.
Жараланғандардың төртеуі медициналық көмек алғаннан кейін ауруханадан шығарылған. Ал сегіз жастағы француз баласының емделуі жалғасқан. Невшехир провинциясының губернаторы Хүсейин Көк ауруханаға барып, баланың жағдайымен танысқан.
Апатқа нөсер жаңбыр себеп болуы мүмкін
Невшехир провинциясының губернаторы Хүсейин Көк жартас опырылуына соңғы күндері жауған нөсер жаңбыр әсер етуі мүмкін екенін айтқан. Алайда апаттың нақты себебі тергеу мен сараптама қорытындысынан кейін анықталмақ.
Невшехир прокуратурасы оқиғаға байланысты тергеу бастаған. Құлаған жартас түзілісінің техникалық жағдайын, опырылудың себептерін және ықтимал салғырттық белгілерін анықтау үшін бес сарапшы тағайындалған. Олар оқиға орнын зерттеп, қорытынды дайындайды.
Құтқару жұмыстары аяқталғаннан кейін Гөреме ашық аспан астындағы музей маңында қауіпсіздік шаралары күшейтілген. Құлаған жартас сынықтарын тазарту және аумақты ретке келтіру жұмыстары жүргізіліп жатыр.
Каппадокияның «ертегі мұржалары» қалай пайда болған?
Каппадокия – Түркияның орталық бөлігінде орналасқан, ерекше табиғи ландшафтымен танымал туристік аймақ. Мұнда жанартау атқылауынан пайда болған жұмсақ жыныстар мыңдаған жыл бойы жел мен судың әсерінен мүжіліп, өзгеше пішіндегі жартас бағандарына айналған.
Жергілікті жерде «ертегі мұржалары» (fairy chimneys) деп аталатын бұл түзілістер Каппадокияның басты туристік нышандарының бірі саналады. Өңір үңгір қоныстарымен, жерасты қалаларымен және тарихи ескерткіштерімен де танымал.
Гөреме ұлттық паркі мен Каппадокияның жартас ескерткіштері 1985 жылдан бері ЮНЕСКО-ның Дүниежүзілік мұралар тізіміне енгізілген. Аймаққа жыл сайын әлемнің түкпір-түкпірінен туристер келеді.
