Оңтүстік Кореяда Jeju Air әуе компаниясының жолаушылар ұшағы апатқа ұшырап, 179 адам қаза тапты. Тағы екі экипаж мүшесі аман қалды. Бұл туралы Оңтүстік Кореяның Көлік министрлігі мәлімдеді, деп хабарлайды buginmedia.kz.
Оқиға 2024 жылғы 29 желтоқсанда Муань халықаралық әуежайында болған. Таиланд астанасы Бангкоктан ұшып шыққан Boeing 737-800 ұшағы қону кезінде апатқа ұшыраған. Бортта 175 жолаушы мен алты экипаж мүшесі, барлығы 181 адам болған.
Алдын ала мәлімет бойынша, ұшақ қонуға жақындаған кезде әуе қозғалысын басқару мұнарасы экипажға әуежай маңында құстардың жүргені туралы ескерту жасаған. Кейін ұшқыштар апаттық дабыл беріп, ұшақты қайта көтеруге әрекеттенген.
Алайда лайнер екінші рет қонуға бет алған кезде шассиі ашылмай, ұшақ ұшу-қону жолағына корпусының төменгі бөлігімен түскен. Салдарынан әуе кемесі жолақтан шығып кетіп, бетон қоршауға соғылған. Соққыдан кейін ұшақ өртеніп, қатты зақымданған.
Апаттың себебі анықталды ма?
Оңтүстік Кореяның авиациялық апаттарды тергеу жөніндегі комиссиясы оқиғаның мән-жайын зерттеген. Алдын ала есепте ұшақтың екі қозғалтқышынан да құспен соқтығысудың белгілері табылғаны айтылған.
Сонымен қатар ұшақтың қара жәшіктері апатқа дейін шамамен төрт минут бұрын жазуды тоқтатқан. Тергеушілер апаттың нақты себептерін анықтау үшін қозғалтқыштар мен өзге де бөлшектерді зерттеген.
Оңтүстік Кореяның Көлік министрлігі 2025 жылғы 6 қаңтарда қаза тапқан 179 адамның барлығы анықталғанын растады. Олардың 147-сі саусақ іздері арқылы, 32-сі ДНҚ сараптамасы арқылы танылған.
