1994 жылғы 26 сәуірде China Airlines әуе компаниясының Airbus A300 жолаушылар ұшағы Тайбэйден Нагояға тұрақты рейс орындаған. Бортта 271 адам — 256 жолаушы және 15 экипаж мүшесі болған. Қонуға жақындаған кезде экипаж ұшақты басқара алмай қалған. Әуе лайнері әуежай маңына құлап, 264 адам қаза тапты, тағы жеті адам ауыр жарақат алды, деп хабарлайды buginmedia.kz МойГород-қа сілтеме жасап.
Ұшу қонуға жақындағанға дейін штаттық режимде өткен. Ұшақ қонуға арналған аспаптық жүйе — ILS арқылы әуежайға бағыт алған. Сол кезде Airbus ұшағын екінші пилот басқарған.
Қону траекториясының белгілі бір нүктесінен өткеннен кейін екінші пилот автопилотты өшіріп, төмендеуді қолмен жалғастырған.
Одан кейін ұшақтың мұрын бөлігі жоғары көтеріле бастаған. Экипаж ұшақты қалыпты траекторияға қайтаруға тырысқанымен, лайнердің жылдамдығы төмендеп, басқару қиындай түскен.
Ұшақ қону жолағына жетпей, әуежай маңына құлаған. Апат салдарынан борттағы 271 адамның 264-і қаза тауып, жеті адам аман қалған.
Кейінгі тергеу барысында апатқа ұшақты басқару жүйесі мен экипаж әрекеттерінің үйлесіміне байланысты бірнеше фактор әсер еткені анықталған. Апаттың себептерін зерттеген мамандар экипаждың ұшақтың мұрын бөлігінің жоғары көтерілуін дер кезінде тоқтата алмағанын да қарастырған.
Оқиға авиация тарихындағы ең ауыр апаттардың бірі ретінде тіркелді.
