Қазақстанда күзде жаңа үйлердің бағасы күрт арзандауы екіталай. Сарапшылардың айтуынша, нарық тұрақты болып, бағаның орнына жеңілдіктер мен бөліп төлеу ұсыныстары көбейуі мүмкін.
Қазақстан құрылыс салушылар қауымдастығының президенті Виктор Микрюковтың айтуынша, құрылыс компаниялары бағаны жаппай төмендетуге асықпайды. Алайда сатып алушыларға жеңілдік жасап, бөліп төлеу немесе жеке келісім ұсыну жиілеуі мүмкін.
Соңғы бір жарым жылда жаңа үйлер барлық ірі қалаларда қымбаттаған. Баға Шымкентте 11,3%-ға, Астанада 32,9%-ға, Алматыда 23,1%-ға, Қарағандыда 59,5%-ға, Ақтауда 63,9%-ға өскен.
Микрюковтың пікірінше, бағаның төмендеу қаупі ең алдымен қымбат тұрғын үй сегментінде байқалуы мүмкін. Бұл бизнес және элиталық санаттағы үйлерге қатысты. Астанада қазірдің өзінде осы сегменттегі баға тұрақтана бастаған. Ал эконом және комфорт санаттарында жыл соңына дейін айтарлықтай өзгеріс күтілмейді.
Krisha.kz сату бөлімінің басшысы Имран Османов та нарықта бағаның күрт төмендеуіне негіз көрмейтінін айтты. Оның сөзінше, сатушылар бастапқыда жоғары баға қояды, бірақ келіссөз кезінде жеңілдік жасауға дайын.
Нақты саудаласу әдетте 1-7% аралығында болады, ал тым қымбат бағаланған нысандарда жеңілдік 10%-ға дейін жетуі мүмкін.
Экономист Эльдар Шамсутдиновтың болжамынша, қараша айының соңына дейін ресми бағалар 0-2% шамасында ғана өзгеруі мүмкін. Ал жеңілдіктер мен бөліп төлеуді есептегендегі нақты баға 3-7%-ға төмендеуі ықтимал.
Оның пікірінше, өзгеріс алдымен ресми бағада емес, сатып алу шарттарынан байқалады. Құрылыс салушылар жеңілдікпен қатар жөндеу, автотұрақ және басқа да қосымша ұсыныстарды жиі ұсынуы мүмкін.
Сарапшы өзгерістердің Астанада көбірек байқалуы мүмкін екенін айтты. Алматыдағы нарықтың тұрақтылығына халықтың көші-қоны, жер тапшылығы және жалға берілетін тұрғын үйге сұраныстың жоғары болуы әсер етеді.
Жалпы сарапшылар күзде пәтер бағасының күрт құлдырауын емес, бағаның тұрақтанып, саудаласу мен жеңілдіктердің көбеюін күтеді.
