Bereke Bank-тегі қате бұрынғы қызметкерге қиындық туғызған
Bereke Bank-тің бұрынғы қызметкері еңбек деректеріндегі лауазымы өз келісімінсіз өзгертіліп, бұл жағдай жаңа жұмысқа орналасуына кедергі болғанын айтты. Әйел банкке мәселені шешу үшін бірнеше рет барып, жұмсаған шығынын өтеуді сұраған.
Лауазымы қалай өзгерген?
Әйел Bereke Bank-те 10 жыл жұмыс істеген. 2023 жылдың сәуірінде бала күтіміне байланысты демалысқа «жетекші тәуекел-менеджері» қызметінен кеткен.
Алайда оның айтуынша, сол жылдың қазан айында еңбек деректерінде лауазымы «менеджер» болып өзгеріп кеткен. Ол мұндай өзгеріске келісім бермегенін және бұл туралы білмегенін мәлімдеді.
Бұл жағдай тек 2026 жылдың ақпанында, банкке жұмыстан өз еркімен шығу үшін барған кезде анықталған.
Қате жаңа жұмысқа орналасуына әсер еткен
Ол кезде әйел басқа компанияға басшылық қызметке орналасуды жоспарлаған. Жаңа жұмыс беруші оның тәжірибесі мен біліктілігін бағалап, оны жұмысқа қабылдауға дайын болған.
Алайда еңбек құжаттарындағы лауазым атауы сәйкес келмеген соң, жұмыс берушіде сұрақтар туындаған. Бұрынғы қызметкерге жағдайды түсіндіріп, еңбек деректерін түзетуге тура келген.
Кейін Bereke Bank бұл ақпараттың қате енгізілгенін мойындаған.
Мәселені шешу үшін Алматыға барған
Бұрынғы қызметкердің айтуынша, еңбек деректерін түзету үшін Алматыға екі рет өз қаражатына барған.
Оның сөзінше, жол ақысына, уақытқа және басқа да шығындарға ақша жұмсаған. Алғашында оған ақпарат бір апта ішінде түзетіледі деп айтылған. Алайда мәселе екі аптаға созылған.
Кейін банк өкілдері ұйымдағы қайта құрылымдауға байланысты деректерді түзету қиын екенін айтқан.
Әйел прокуратура мен еңбек инспекциясына жүгінгеннен кейін банк оған ресми жауап берген.
Банк қателікті техникалық ақау деп түсіндірді
Bereke Bank еңбек деректеріндегі қателікті мойындап, оның ақпараттық жүйеге мәлімет енгізу кезінде кеткен техникалық қате екенін түсіндірген.
Алайда бұрынғы қызметкер бұл түсініктемеге күмәнмен қарайды.
«Егер бұл шынымен техникалық қате болса, оның салдарынан менің еңбек деректерімде “жетекші тәуекел-менеджері” деген лауазымның орнына “менеджер” қалай пайда болды?» – деді ол.
Қазір әйелдің электронды еңбек деректері түзетілген. Бірақ оның айтуынша, қателіктің салдарынан туындаған мәселелер мен шығындар өтелмеген.
800 мың теңгеге жуық өтемақы сұрады
Бұрынғы қызметкер кішкентай баласын тәрбиелеп отырғанын және Алматыдан шамамен 1200 шақырым қашықта тұратынын айтты.
Ол алғашқы екі сапарына кеткен шығынды және алдағы жол ақысын өтеуді сұраған. Жалпы өтемақы көлемін шамамен 800 мың теңге деп бағалаған.
Әйелдің сөзінше, банк алғашқы сапарларға жұмсалған шығынды өтеуден бас тартып, тек Алматыға баратын жол ақысын төлеуді ұсынған.
Кейін ол өзіне және баласына Алматыға барып-қайту жол шығынын өтеуді сұрағанымен, бұл ұсынысы да қолдау таппағанын айтты.
Банк не дейді?
Bereke Bank еңбек деректеріндегі қателікті мойындап, ақпараттың түзетілгенін хабарлады.
Банк өкілдерінің айтуынша, бұрынғы қызметкердің кеңсеге бірнеше рет баруын қаржы ұйымы талап етпеген. Мәселені қашықтан шешудің бірнеше жолы ұсынылған. Соның ішінде еңбек кітапшасын курьер арқылы жіберу, сондай-ақ Алматыға бару қажет болса, сапарды ұйымдастырып, жол шығынын төлеу мүмкіндігі қарастырылған.
Банк бұрынғы қызметкердің өтемақы туралы талабын да қарауға дайын екенін мәлімдеді. Алайда шығын көлемін растайтын құжаттар мен істің мән-жайы ескерілетінін атап өтті.
«Банк еңбек деректеріндегі қателікті мойындап, оны түзетті. Бұрын ұсынылған шешімдер күшінде. Өтемақы мәселесін жағдайдың мән-жайы мен шығынды растайтын құжаттарды ескере отырып қарауға дайынбыз», – делінген банк жауабында.
Қаржы ұйымы бұл жағдай жеке еңбек қатынастарына қатысты болғандықтан, мәселені бұрынғы қызметкер мен банк мамандары арасында тікелей талқылауды ұсынды.
Бұрынғы қызметкер мәселе шешілмесе сотқа жүгінетінін айтты.
