Түркістан облысы Мақтаарал ауданы Қоңырат ауылының тұрғыны Әзиз Құралбаевтың туған-туыстары ел президенті мен бас прокурорға үндеу жолдап, көмек сұрады. Олар бір жылдан бері әділдікке жете алмай жүр. Айтуларынша, Әзиз Құралбаевты көрші ауылдың жігіттері сол ауылдағы қалыңдығына барғаны үшін ұрып-соғып, азаптаған. Төсекке таңылған жігіт 3 айдан соң қайтыс болған.
Оқиға 2024 жылдың 11 қарашасында болған.
«Інімнің сау жері жоқ. Оң жақ қабырғасынан тебе берсе керек. Қап-қара ұйып қалған қан тұрды. Қолын үш-төрт жерден күйдірген. Інім талып қалған кезде «өтірік жатыр» деп ояту үшін денесін күйдірген», — дейді ағасы Альмир Құралбаев.
Әзиздің әпкесі Мөлдір Үсенбаеваның сөзінше, інісінің өліміне алты жігіттің қатысы бар. Алайда сот алдында тек төрт адам жауап беріп жатыр. Ал екеуі куә ретінде танылған. Әзиздің туған-туыстары мұнымен келіспейді. Олар екі адам «ықпалды туған-туыстары болғаны үшін жауапкершіліктен сытылып кетуі мүмкін» деп күдіктенеді.
СОТ НЕ ДЕЙДІ
Іс қазір Жетісай аудандық сотында қаралып жатыр. Сот үкімі әлі шықпаған.Түркістан облыстық соты баспасөз қызметінің мәліметінше, айыптау актісі бойынша төрт сотталушы бар. Олардың екеуіне қылмыстық кодекстің 106-бабы 3-бөлігі бойынша айып тағылған. Сотта жарыссөз аяқталып, судья кеңесу бөлмесіне кеткен.
