Бұл туралы Шерзат Полаттың ісінде жәбірленушілердің мүддесін қорғаған адвокат Мейірман Шекеев әлеуметтік желідегі парақшасында жазды.
«Нұрқанаттың ісі тоқтатылған. Алайда біз болашақта істі қайта жандандыру үшін өтінішхат түсіреміз», – деп жазды Шекеев.
Айта кетейік, 2024 жылдың желтоқсанында Нұрқанат Ғайыпбаев өлі табылды. Жергілікті полиция ол өзіне қол салған деген болжам айтты.
«Сот-медициналық сараптаманың алдын ала болжамы бойынша, 9 желтоқсанда Талғардың шетінде табылған 30 жастағы ер адамның өзіне қол салу салдарынан қайтыс болғанын көрсетті. Денесінде зорлық-зомбылық сипаттағы белгілер жоқ», – деп хабарлады полиция департаменті.
Бұған дейін 2024 жылдың 4 қазанында Алматы облысы Талғар қаласында «Қамажай» дүкені алдында жанжал болып, 16 жастағы жасөспірім Шерзат Полат көз жұмды. Қылмыстық іс бойынша 9 адам 1,5 жылдан 23 жылға дейін сотталды.
