"Біздің @onestopservice_1qadam орталығына 8 жылға сотталған, көпбалалы анадан өтініш келген .Бес баласы бар әйелдің бүкіл өмірі зорлық-зомбылықпен өткен. Бірақ әйелін тепкінің астына алған алқаш, анаше шегетін еркектің қолына кісен салынбаған. Соңғы рет күйеуі әдеттегідей әйелін көкала қойдай сабап, үсті-басын пышақпен тілімдеген. Сол кезде екеуі алысып жатқанда пышақ жазатайым күйеуіне тиіп, қайтыс болады. Қасақана өлтірмеген, өзін қорғау үшін абайсызда күйеуін өлтіріп алған бес баланың анасы осыдан соң түрмеге қамалады. Сот үкімі шыққанда бір баласы омырауда еді. Қазір өзі түрмеде, төрт баласы Бағанашылдағы балалар үйінде, ең кішкентайы сәбилер үйінде.
Өкінішке орай, заңнан қорғаныш таппаған әйелдер өз-өзін қорғау үшін небір аянышты жағдайға барады. Полицияға сенім жоқ өйткені.
Бұл әйелдің ісін қараған тергеушілер – ер адам, сот шешімін шығарған да ер адам. Олар қайтыс болған ер адамның құқығын қорғап, әйелдің қорғану барысында абайсызда жасаған ісін ескермей, 8 жылға соттап жіберген.
Бұл біздегі құқықбұзушылыққа жеңіл санатты белгілеу арқылы, ауыр және аса ауыр қылмыстың артуына алып келіп отырғанын көрсетеді.
Осы ретте қайтыс болған еркектің жылдар бойы әйелін қорлап келгені, әйелдің тұрмыстық зорлық-зомбылық құрбаны екені, оның қамқорлығында бес бірдей баланың бар екені, ол балалар жетімдік зардабын тартпауы үшін тым болмаса, анасы жанында болуы керектігі ескеріліп, жеңілдетілген жаза тағайындалуы керек еді. Өкінішке орай, біздің заңда зорлықтан қорғану мақсатында абайсызда адам өлтіріп алу деген бағыттағы түсінік мүлдем жоқ", - деп жазды құқық қорғаушы.
