Қазақстанда пациенттерге тегін берілуі тиіс дәрі-дәрмектер дәріханаларда қайта сатылған. 2026 жылы мұндай заңбұзушылықтар 788 субъектіден анықталған. Бұл туралы Үкімет отырысында Денсаулық сақтау министрі Ақмарал Әлназарова мәлімдеді, деп хабарлайды buginmedia.kz.
Заңбұзушылықтар дәрілік заттарды цифрлық таңбалау жүйесі арқылы анықталған. Сонымен қатар жүйе дәрілердің айналымнан қайта шығарылғанын және препараттардың белгіленген шекті бағадан жоғары сатылғанын тіркеген.
«Анықталған заңбұзушылықтар саны өткен жылмен салыстырғанда 10 есе өсті», – деді Ақмарал Әлназарова.
Министрдің айтуынша, тіркелген барлық заңбұзушылық бойынша әкімшілік хаттамалар толтырылып, кінәлілерге айыппұл салынған.
«2024 жылы енгізілген таңбалау жүйесі дәрілік заттардың қозғалысын бақылауға, қорларды басқаруға және бағаны нақты уақыт режимінде қадағалауға мүмкіндік береді», – деді министр.
Дәрілерді таңбалау жүйесі қалай жұмыс істейді?
Әр дәрі қаптамасына бірегей цифрлық код салынады. Осы код арқылы жүйе препараттың өндірушіден бастап тұтынушыға дейінгі қозғалысын бақылайды. Егер пациентке тегін берілуі тиіс дәрі бөлшек саудаға түсіп, дәріханада сатылса, жүйе мұндай заңбұзушылықты анықтай алады.
