Бірін-бірі пышақтап тастады деген қос бала 9-шы сыныпта оқиды. Қазір біреуі үйінде ем-домделіп жатса, енді біреуі жансақтау бөлімінен бүгін шығарылды. 13 жастағы екі оқушы күреске бірге қатысып, дос та болған. Сол оқиға күні сабақтан кейін олар ат үйретпек болып, арты қырғынға ұласқан. Біреуі пышақ ала жүгірген көрінеді. Үсті-басы қанжоса болған бала әпкесінің үйіне қашып барған.
"Шамамен отасы 6 сағаттай болды. Дәрігердің бізге айтуы бойынша, 10-15 шақты жерден пышақтаған.. Біз арқасында ғана деп ойладық. Сөйтсек, жанбас жағында да бар. Ойнауға барамыз деп шақырғанан кейін, ойында ештеңе жоқ, бірге еріп барған. Ондай жағдай болатынын өзі де білмеген. Аяқ асты болды. «Қашып құтылдым» деді", - дейді Омардың әпкесі Ләззат Камзаева.
Бір-біріне пышақ жарақатын салған сыныптастар жедел жәрдем көлігімен ауруханаға жеткізілді. Дәрігерлер біреуінің денесіндегі тілінген жарақаты жеңіл болғанын айтады. Сондықтан оны үйіне емделуге жіберіпті. Ал қансырап қалған Омарға шұғыл ота жасалды. Қазір баланың беті бері қарағанымен, алған жарақаты ауыр.
"Іш қуысына өткен пышақ жарақаты, оң жақ бүйрек паренхимасы мен үлкен шарбы зақымданған, іш қусына қан кетіп асқынған. Денесі мен аяқ-қолында көптеген пышақ жарақаты. І дережелі геморрагиялык шок. Қарқынды терапия бөлімшесінде шұғыл диагностикалық және емдік шара жургізілді. Төрт сағат бойы ота жасалды. Қазір баланың жағдайы тұрақты және балалар хирургиясы бөлімшесіне ауыстырылды", - дейді Семей медицина университеті госпиталінің педиатрия жөніндегі директорының орынбасары Дулат Каримов.
Ал балалар білім алатын №52 мектеп басшылығы оқушылардың бойынан ерсі қылық байқалмағанын айтып отыр. «Екеуі де тәртіпті- тәрбиелі» деген мұғалімдер олрдың арасында төбелестің неден шыққанын түсінбей дал.
"Екі бала да мектепте есепте немесе қалада есепте жоқ, ешқандай құқық бұзушылықпен тіркелмеген. Екеуі де бір сыныпта оқиды. Жақсы достар. Аяқ асты болған оқиғаны түсініспеуден болды деп естідік. Өйткені мектептен тыс, өз үйіне барып, одан шығып, түстен кейін болған оқиға", - дейді №52 мектеп директорының тәрбие-ісі жөніндегі орынбасарының міндетін атқарушы Гүлжан Сағымғали.
Қазір полиция қылмыстық іс қозғады. Олар сотқа дейінгі тергеп-тексеру жүргізуде. Сондай-ақ тергеу қортындысына сәйкес, бір-біріне пышақ сілтеген балалар есепке алынды.
