Алдын ала мәлімет бойынша, күдікті бұрынғы шенеуніктің көмекшісінің көмекшісі болып жұмыс істеген 31 жастағы Нурболат есімді ер адам. Ол үйде бағалы заттардың қай жерде сақталатынын білген.
Байбектің отбасы шетелге кеткен уақытта күдікті қызметтік көлікте болған қосалқы кілттерді пайдаланып, үйге кірген. Алайда ол сағаттарды жай ғана алып кетпей, олардың түпнұсқаларын алдын ала сатып алған көшірмелерімен ауыстырған.
Ұрланған сағаттардың арасында Breguet, Blancpain, Hublot, Jaeger-LeCoultre және A. Lange & Söhne маркалары болған. Олардың жалпы құны шамамен 90 млн теңге деп бағаланып отыр.
Үй иелері елге оралғаннан кейін сағаттардың түпнұсқа емес екенін анықтап, полицияға хабарласқан.
Құқық қорғау органдары күдіктіні жедел анықтап, оны уақытша ұстау изоляторына қамаған. Тергеу барысында ол қылмысын мойындап, ұрланған заттарды сатып алушының аты-жөнін айтқан.
Қазір аталған факті бойынша сотқа дейінгі тергеу жүріп жатыр.
Полицияның мәліметінше, күдіктіге қатысты бұлтартпау шарасы мен қылмыстық істің одан әрі саралануы тергеу нәтижесіне қарай анықталады.
