ҰҚК Қазақстанның Қылмыстық-процестік кодексінің 201-бабына сілтеме жасап, сотқа дейінгі тергеп-тексеру деректері жария етілмейтінін хабарлады.
«ҚР заңнамасына сәйкес, Өзбекстан тарапы дипломатиялық арналар арқылы ресми түрде хабардар етілді», – делінген ҰҚК жауабында.
Комитет Корабоевтың процестік мәртебесін, істің қай бап бойынша тергеліп жатқанын және оған қандай күдік тағылғанын нақтыламады.
Профессордың ұсталуына не себеп?
BBC бұған дейін 46 жастағы Өзбекстан азаматы Икболджон Корабоевтың 3 шілдеден бері Астанада қамауда отырғанын хабарлаған. Басылымның мәліметінше, ол Мақсұт Нәрікбаев университетінде халықаралық қатынастар пәнінен сабақ берген.
Профессордың туыстары BBC-ге оны тыңшылық жасады деген күдікпен ұстағанын айтқан. Алайда ҰҚК бұл ақпаратты ресми түрде растаған жоқ және қылмыстық істің бабы туралы түсініктеме бермеді.
Ғылыми зерттеуі
Корабоев ұсталғанға дейін халықаралық қатынастар, өңірлік интеграция және маңызды минералды ресурстар тақырыбында зерттеулер жүргізген. BBC жазуынша, оның соңғы еңбектерінің бірі Қазақстан мен Өзбекстандағы маңызды минералдарға қатысты құқықтық және саяси саясатты салыстыруға арналған, бірақ бұл зерттеу әлі жарияланбаған.
