Оның сөзінше, биыл тарифтің өсуі 2 пайыздан аспайды. Ал бес жылдық кезеңде компания тарифті орта есеппен 11–13 пайызға көтеруді көздеп отыр. Дегенмен нақты мөлшерін реттеуші орган анықтайды.
«Алдын ала болжам бойынша, биылғы өсім шамалы болады – 2 пайыздан аз. Ал алдағы бес жылда орташа тариф шамамен 11–13 пайыз шамасында өседі деп отырмыз. Бірақ нақты санын әзірге білмейміз, қазір Табиғи монополияларды реттеу комитеті қарап жатыр», – деді Нәби Айтжанов.
Комитет шешімі тамыз айының соңына дейін қабылдануы керек.
KEGOC басшысы компания тарифінің электр энергиясын түпкілікті тұтынушы төлейтін бағадағы үлесі шамамен 7 пайыз екенін атап өтті. Осыған байланысты KEGOC тарифінің өсуі халық үшін электр энергиясының соңғы құнына айтарлықтай әсер етпейді деп күтіледі.
