«Ұлттық ақпараттық технологиялар» АҚ хабрлауынша, жүйе жаңартылды. Енді eGov талапкердің бұған дейін конкурссыз грант алған-алмағанын автоматты түрде тексереді. Егер талапкер грант иесі болса, жүйе бұл туралы бірден көрсетеді және қайта өтініш берудің қажеті болмайды.
Ал қалған талапкерлер құжаттарын бұрынғы тәртіппен тапсыра береді. Егер жеңілдігі болса, өтініш кезінде оны көрсетуі керек. Жүйе жеңілдікті арнайы дерекқорлар арқылы өзі тексеріп, растайды.
Өтініш беру үшін:
eGov жүйесіне кіру керек;
«Азаматтарға» → «Білім» → «Жоғары білім» бөлімін таңдау қажет;
грант беру қызметін ашып, онлайн өтініш жіберу керек;
қажетті мәліметтерді толтырып, өтінішке қол қою қажет;
нәтижесін жеке кабинеттен бақылауға болады.
eGov Mobile қосымшасында да өтініш беру тәртібі осындай.
Мамандардың айтуынша, өтініш беру кезінде порталға көп адам кірсе, электронды кезек жүйесі қосылады. Кезек келгенше браузерді жаппау немесе бетті жаңартпау керек. Әйтпесе кезек жоғалып кетуі мүмкін.
Кезекті бақылап отырмас үшін талапкерлер:
SMS арқылы хабарлама алу функциясын қоса алады;
1414 қызметінен хабарлама күте алады;
қажет болса, телефон нөмірін қолмен енгізе алады.
Өтініш сәтті қабылданса, талапкердің eGov-тағы жеке кабинетіне грант конкурсына қатысқаны туралы электронды анықтама келеді.
Құжат қабылдау 13 шілде сағат 09:00-де басталып, 20 шілде сағат 18:00-де аяқталады. Ал грант нәтижелері бойынша сертификаттар талапкерлердің жеке кабинетіне 10 тамызға дейін жіберіледі.
