Кеше ғана екі адам қаза тапқан орын бүгінде әдеттегі қалпына келген. Оқиға болған аумақта полиция мен жедел жәрдем көліктері жоқ. Әйел құлаған тротуар да жуылып, тазаланған.
Адамдар жолмен әдеттегідей жүріп жатыр. Кей тұрғындар бұл жерде бір күн бұрын қайғылы жағдай болғанын білмейді.
Оқиға салдарынан 27 жастағы әйел мен екі жасар бала көз жұмған. Алдын ала мәлімет бойынша, әйел биіктен құлап, төменде тұрған баланың арбасына түскен.
Көршілес үйде тұратын зейнеткер қайғылы оқиға туралы естімегенін айтқан.
– Осында ма? Кеше ме? Күндіз болды ма? – деп таңғалған ол сенбі күні үйден шықпағанын, бірақ болған жағдайдан хабарсыз екенін айтты.
Оның сөзінше, әдетте аумақта қандай да бір оқиға болса, тұрғындар ортақ чатта бір-біріне хабарлайды. Алайда бұл жолы ешкім жазбаған.
– Әдетте бірдеңе болса, біздің чатқа жазады. Бірақ бұл жағдай туралы ештеңе айтылмады. Мүмкін, бұл жерде болмаған шығар? – дейді ол.
«Басында не болғанын түсінбедім»
Алайда қайғылы жағдай дәл осы үйдің маңында болған. Оқиға орнына жақын орналасқан дүкеннің сатушысы бастапқыда не болғанын түсінбегенін айтты.
– Иә, шынымды айтсам, алғашында ештеңе түсінбедім. Біртүрлі тұйық дыбыс естілді, содан кейін адамдар айқайлай бастады, – дейді ол.
Оның айтуынша, арнайы қызмет өкілдері оқиға орнында бірнеше сағат жұмыс істеген. Дүкен сатушысы баланың анасын көрмеген.
– Менің білуімше, ол үлкен баласын шахматқа әкелген. Баласын ішке кіргізіп жатқан кезде осы жағдай болған, – дейді сатушы.
Қауіпсіздік мәселесі көтерілді
Қайғылы оқиғадан кейін Астана тұрғындары әлеуметтік желіде қазіргі көпқабатты үйлердің қауіпсіздігіне қатысты сұрақтар көтерді. Биік тұрғын үйлердің кейбірі ондаған қабаттан тұрады. Сондықтан жерден 10-қабаттан жоғары деңгейде не болып жатқанын көру іс жүзінде мүмкін емес.
Алайда биіктен тротуарға құлаған заттан жаяу жүргіншілерді қорғайтын ешқандай арнайы қорғаныс жоқ. Тұрғындар тағы бір қауіпке назар аударды: ғимараттардың сыртына кондиционерлер орнатылған. Олардың бірі құлап кетсе, төмендегі адамдарға қауіп төнуі мүмкін.
Үй тұрғындары болған жағдайды қайғылы кездейсоқтық деп бағалайды.
– Бізде балалар көп тұратын өте жақсы үй. Олар үшін барлық жағдай жасалған: аула жабық, балалар алаңы бар, – дейді тұрғындардың бірі.
Шынында да, үйдің ауласы қауіпсіздік талаптарына сай жасалғандай көрінеді. Аумаққа тұрғындардың рұқсатынсыз кіру мүмкін емес, аулаға апаратын қақпа жабық.
Көліктер кіретін жабық аумақта балалардың велосипедтері шашылып жатыр. Бұл аулада балалардың жиі ойнайтынын аңғартады.
Ересек тұрғындар көліктерін үй маңындағы тар тұрақтарға немесе паркингке қояды. Алайда көпқабатты үйдің басқа да мәселелері бар. Тұрғындардың айтуынша, олардың бірі – үйде тұрақты тұрмайтын жалға алушылардың көптігі.
– Терезеден құлаған қызды танымаймын. Квартирант болған дейді. Біреулер оның жүкті болғанын, бұл туралы жігітіне айтқанын, кейін екеуінің жанжалдасқанын айтып жүр. Содан кейін осындай жағдай болған дейді. Біреу пәтерді сол түні ғана жалға алған деп жазды. Бірақ мен нақты білмеймін, өзім көрген жоқпын. Жалпы, бізде жалға берілетін пәтер көп. Ал квартиранттар ешкіммен араласа бермейді, – дейді тұрғын.
Әйел оқиға болған сәтті өзі көрмеген. Қайғылы жағдай туралы көршілерінен естіген.
– Ең қорқыныштысы – баланың зардап шеккені. Оның еш кінәсі жоқ, ол бұл жерде кездейсоқ болған. Ата-анасын аяймын. Анасына да жедел жәрдем шақырылған, жағдайы нашарлапты деп естідім, – дейді ол.
Оқиғадан кейін полиция қылмыстық іс қозғады. Қайғылы жағдайдың барлық мән-жайы анықталып жатыр.
