Ресейдің Омбы қаласында құрылыс алаңында болған өрттен кейін Қазақстан азаматы қаза тапты. Оқиғаға байланысты Қазақстанның Сыртқы істер министрлігі пікір білдірді.
Ресейлік БАҚ мәліметінше, Омбы қаласында құрылыс алаңында өрт 15 тамызда болған. Оқиға салдарынан екі жұмысшы қаза тапқан. Олардың бірі – 2002 жылы туған Қазақстан азаматы.
Алдын ала мәлімет бойынша, қазақстандық азаматтың денесінің шамамен 70 пайызы күйік шалған. Ол ауыр жарақатпен ауруханаға жеткізіліп, 18 тамызда көз жұмған.
Қаза тапқан 2002 жылы туған Қазақстан азаматы құрылыс нысанында мердігер ретінде жұмыс істеген «Глобал инжиниринг» компаниясында еңбек еткені анықталды. Қазіргі уақытта тергеушілер өрттің шығу себептерін және құрылыс алаңындағы қауіпсіздікке жауапты тұлғаларды анықтап жатыр.
Қазақстанның Сыртқы істер министрлігінің мәліметінше, ҚР-ның Омбыдағы Бас консулдығы марқұмның отбасына қажетті консулдық-құқықтық көмек көрсетіп жатыр.
Атап айтқанда, консулдық қызметкерлер құжаттарды рәсімдеуге және азаматтың өліміне қатысты мән-жайларды анықтау үшін Ресейдің құзыретті органдарымен өзара іс-қимыл жасауға көмектесуде.
«СІМ қаза тапқан азаматтың отбасымен байланыста және өз құзыреті шеңберінде қажетті көмек көрсетіп жатыр», – деп хабарлады министрлік.
Қазақстан СІМ марқұмның жақындары мен туыстарына көңіл айтты.
