Иран парламентінің спикері Мұхаммад-Багер Галибаф АҚШ-тың шабуылдарына жауап беру тәсілі өзгергенін мәлімдеді. Оның айтуынша, Тегеран енді Вашингтонның кез келген жаңа соққысына бұрынғыдан да қатаң жауап бермек.
Галибаф «симметриялы жауап дәуірі» аяқталғанын айтып, Иранның жуырдағы АҚШ-тың Таяу Шығыстағы әскери базаларына жасаған соққыларын тек бастамасы деп атады.
«Бұл тек бастамасы. АҚШ қарсыласудың өзгерген ережелерін ескеруі керек. Иранның мүддесі мен қауіпсіздігіне жасалған кез келген жаңа соққыға бұдан да жылдам, қатаң әрі ауыр жауап беріледі», – деді Галибаф.
Ол Тегеранның АҚШ-қа қарсы тұрудағы негізгі құралдары ретінде ел ішіндегі бірлікті және сыртқы тежеу саясатын атады.
Иранда экономикалық жағдай күрделі
Сонымен қатар Галибаф Иран ішіндегі экономикалық ахуалдың күрделі екенін мойындады. Оның айтуынша, ұлттық валютаның бағамы, инфляция мен жұмыссыздықтың өзгеруі халыққа қысым түсіріп отыр.
Иран парламентінің спикері ішкі тұрақтылықты сақтаудың маңызын атап өтіп, елдің сыртқы қысымға төтеп беруі үшін қоғамның бірлігі қажет екенін айтты.
АҚШ та тактикасын өзгертпек
Осыған дейін АҚШ Қарулы күштері Орталық қолбасшылығының басшысы Брэд Купер Вашингтонның да қақтығыстағы тактикасын өзгертіп жатқанын мәлімдеген.
Оның сөзінше, егер Иран күштері америкалық кемелерге шабуыл жасаса, АҚШ жауап ретінде Иранның кемелерін, соның ішінде қорғалмаған мұнай танкерлерін де жоюға дайын.
Осылайша, екі тарап та қарсы жақтың әскери әрекеттеріне жауап беру тәсілдерін қайта қарастырып жатқанын мәлімдеді.
