Маңғыстау облысында оқу-жаттығу кезінде тоғыз әскери қызметші қаза тапқан Каспий жағалауындағы оқиға орнынан видео жарияланды, деп хабарлайды buginmedia.kz.
Каспийдегі қайғылы оқиға: оқиға орнына вице-премьер ұшып кетті
Каспий теңізінде әскери қызметшілер қаза тапқан оқиға орнына вице-премьер Қанат Бозымбаев ұшып кетті. Бұл туралы Ulysmedia.kz редакциясына дереккөздер хабарлаған.
Оқиғаның нақты қалай болғаны әзірге белгісіз. Блогер Азамат Сәрсенбаев әлеуметтік желідегі жазбасында бейресми деректерге сүйеніп, әскери қызметшілердің кемеден жағаға түсу жаттығуын орындағанын жазды.
Оның мәліметінше, сарбаздар толық әскери киіммен кемеден түсіп, жағаға қарай қозғалған кезде шамамен екі метр тереңдіктегі тайыз жерге тап болған. Дауылды ауа райы мен ауыр жабдық салдарынан олар жағаға шыға алмаған.
Бұл нұсқа әзірге ресми түрде расталған жоқ.
Қандай оқу-жаттығу?
Қайғылы оқиға «Хазар қорғаны-2026» оқу-жаттығуы кезінде болған. Маневрлер Каспий теңізінің Қазақстан секторында өтіп жатыр.
Оқу-жаттығуға Әскери-теңіз күштерінің 500-ден астам әскери қызметшісі, әскери кемелердің экипаждары, жағалау бөлімшелері, сондай-ақ ҰҚК Шекара қызметінің Маңғыстау облысындағы жағалау күзеті мен әуе қорғанысы күштері қатысқан.
Әлеуметтік желідегі мәліметтерде әскери қызметшілердің «Қайсар» кемесінен десант түсіру жаттығуын орындағаны айтылған. Сондай-ақ 29011 және 21814 әскери бөлімдері аталған.
Бұған дейін әскери қызметшілердің қаза болуына байланысты қылмыстық іс қозғалғаны хабарланған. Оқиға орнында ІІМ, ТЖМ және прокуратура қызметкерлерінен құралған жедел-тергеу тобы жұмыс істеп жатыр. Сот сараптамалары тағайындалған, тергеу ерекше бақылауға алынған.
Алдын ала мәлімет бойынша, теңізге 19 әскери қызметші кеткен. Тоғызы қаза тапты, үшеуі құтқарылды, қалғандарын іздеу жұмыстары жалғасып жатыр.
Оқиға орнына Қорғаныс министрі Дәурен Қосанов бастаған министрлік комиссиясы да аттанған.
Айта кетейік, бұған дейін Каспийдегі әскери оқу-жаттығу кезінде 9 әскери қызметші қаза тапқанын жазған едік.
