Отбасы банк кепілге қойылатын тұрғын үйге қатысты талаптарды жаңартып, ипотекаға жарамды баспаналардың қатарын кеңейтті.
Жаңа талаптарға сәйкес, енді жасы 60 жылға дейінгі панельді үйлерден пәтер сатып алуға ипотека рәсімдеуге болады. Бұған дейін банк тек 50 жылдан аспаған панельді үйлерді кепіл ретінде қабылдайтын. Сонымен қатар, ипотекаға жарамды панельді тұрғын үйлердің салынған жылына қатысты талап та өзгерді. Енді 1976 жылдан емес, 1966 жылдан бері пайдалануға берілген панельді үйлердегі пәтерлерді де несиеге сатып алуға мүмкіндік бар.
Өзгерістер жеке тұрғын үйлерге де қатысты. Бұдан былай банк SIP-панельдерден салынған үйлерді де кепіл ретінде қабылдайды. Алайда мұндай баспаналар бірнеше талапқа сай болуы тиіс: үй пайдалануға берілгеніне бес жылдан аспауы, SIP-панельдердің сертификатталған болуы, іргетасының капиталды болуы, ішкі әрлеу жұмыстары толық аяқталуы және барлық инженерлік коммуникациялардың жүргізілуі міндетті.
Жаңа талаптар, әсіресе ескі панельді тұрғын үй қоры басым Алматы сияқты қалаларда баспана сатып алуды жоспарлаған азаматтардың таңдау мүмкіндігін айтарлықтай кеңейтеді.
