Атырауда әйелін 28 рет пышақтаған ер адам сотталып жатыр: қанды оқиғаны үш жастағы қызы көрген

Атырауда 37 жастағы Ерсінбек Жұмағалиев азаматтық некедегі әйелі Алмагүл Шымырованы 28 рет пышақтады деп айыпталып отыр. Қанды оқиға кезінде ерлі-зайыптының үш жастағы қызы да үйде болған. Қазір қылмыстық істі судья Зарема Хамидуллина қарап жатыр, деп хабарлайды buginmedia.kz.

Оқиға 2026 жылдың шілдесінде болған. КТК телеарнасының хабарлауынша, кішкентай қыз анасына жасалған шабуылдың куәгері болған. Ер адам әйелін қансырап жатқан күйі қалдырып, үш жастағы қызын да сол жерде тастап кеткен. Бүлдіршіннің анасының жанында бір тәуліктен астам уақыт болғаны айтылды.

Сот отырысында айыпталушы бұған дейін әйелімен ақша, алимент және несие мәселелеріне байланысты жиі жанжалдасқанын айтты. Ол болған оқиғаға марқұмның өзін кінәлап, әйелдің қолына пышақ алып жүгіргенін, ал өзінің қорғану үшін осындай әрекетке барғанын мәлімдеді.

Алайда судья оның үш жастағы қызын не себепті анасының жанында қалдырып кеткенін сұрағанда, айыпталушы нақты жауап бере алмады.

Сот барысында судья Зарема Хамидуллина айыпталушыға марқұмның көзі ашық жатқанын көргенін еске салды.

«Әйеліңіздің көзі ашық қалғанын көріп тұрсыз. Көзі ашық қалу оның кейіннен қайтыс болғанын көрсетеді», – деді судья.

Ал марқұмның анасы сотталушыны өмір бойына бас бостандығынан айыруды сұрап отыр.

Айта кетейік, Алмагүл Шымырова төрт баланың анасы болған. Ол Ерсінбек Жұмағалиевпен алты жыл азаматтық некеде тұрған. Қазіргі уақытта сот процесі жалғасып жатыр.