«Қазақстандық жүргізушілерге 86 500 теңгеге дейін айыппұл салынады: жазалау қашан басталады?»

Қазақстанда жүргізушілерге қысқы дөңгелекке уақытылы ауысу ескертілді. Полиция көлік иелерін желтоқсанды күтпей, автокөліктерін қысқы маусымға дайындауға шақырды. Алайда қысқы дөңгелекке қатысты міндетті талап 1 желтоқсаннан бастап күшіне енеді, деп хабарлайды buginmedia.kz.

finratings.kz жазуынша, қолданыстағы талапқа сәйкес, 1 желтоқсаннан 28 ақпанға дейін жеңіл автокөліктер мен жеңіл жүк көліктерінің барлық дөңгелегіне қысқы шина орнатылуы керек. Тек алдыңғы немесе артқы дөңгелектерді ауыстыру жеткіліксіз.

Қандай айыппұл салынады?

Қысқы дөңгелекке қатысты талапты бұзғандарға Әкімшілік құқық бұзушылық туралы кодекстің 590-бабы бойынша айыппұл қарастырылған.

2026 жылы бір айлық есептік көрсеткіш (АЕК) 4 325 теңгеге тең. Осыған сәйкес:

5 АЕК – 21 625 теңге;

20 АЕК – 86 500 теңге.

Дегенмен 86 500 теңге көлеміндегі айыппұл барлық жүргізушіге бірдей салынбайды. Жазаның мөлшері құқық бұзушылықтың мән-жайына және заңның тиісті бөлігіне байланысты белгіленеді.

Қысқы дөңгелекті желтоқсанға дейін ауыстыру туралы ескерту айыппұл салу басталды дегенді білдірмейді. Міндетті талап 2026 жылғы 1 желтоқсаннан 2027 жылғы 28 ақпанға дейін қолданылады.

Полиция ауа райының желтоқсанға дейін де күрт өзгеруі мүмкін екенін ескертеді. Суықта жазғы шинаның жолмен ілінісуі нашарлап, қар мен көктайғақта көліктің тежеу қашықтығы ұлғаяды. Сондықтан жүргізушілерге қысқы дөңгелекті алдын ала ауыстырып, көлік арасындағы қауіпсіз қашықтықты сақтап, жылдамдықты төмендету ұсынылады.