4 мыңнан астам адам мінген круиздік кеме жартастарға соғылып, аударылып қалды

2012 жылы 13 қаңтарда Италия жағалауында Costa Concordia круиздік лайнері су астындағы жартастарға соғылып, бортындағы мыңдаған жолаушымен бірге апатқа ұшырады. Қайғылы оқиға салдарынан 32 адам қаза тапты, деп хабарлайды buginmedia.kz.

Апат кезінде кемеде 4 229 адам болған. Оның 3 206-сы жолаушы, қалған 1 023-і экипаж мүшелері еді.

Оқиға Жерорта теңізіндегі Джильо аралының маңында болған. Кеме капитаны Франческо Скеттино жоспарланған бағыттан ауытқып, жағалауға тым жақын жүруге шешім қабылдаған. Алайда лайнер су астындағы жартастарға соғылып, оң жақ бортында ұзындығы шамамен 50 метр болатын үлкен тесік пайда болған. Соның салдарынан кемеге су кіріп, электр жүйесі істен шыққан.

Бастапқыда жолаушылар не болғанын түсінбей қалған. Кейін кеме біртіндеп қисайып, батып бара жатқаны белгілі болған. Алайда экипаж жолаушыларға қауіп туралы бірден хабарламаған. Толыққанды эвакуация апаттан бір сағаттан астам уақыт өткен соң басталған.

Кеме қатты қисайғандықтан, құтқару қайықтарын түсіру қиынға соққан. Кейбір жолаушылар суық теңізге секіріп, өздігінен жағаға жетуге мәжбүр болған. Құтқару жұмыстарына жағалау күзеті, өрт сөндірушілер, полиция, әскери қызметкерлер мен сүңгуірлер жұмылдырылған.

Ресми мәлімет бойынша, борттағы 4 229 адамның 4 197-сі аман қалған. 32 адам қаза тапқан.

Капитан жолаушылардан бұрын кемені тастап кеткен

Апаттан кейін капитан Франческо Скеттиноның әрекеті үлкен сынға ұшырады. Тергеу мәліметінше, ол кемеде әлі де жолаушылар мен экипаж мүшелері қалып қойған кезде лайнерді тастап кеткен.

Осы оқиғадан кейін оның жағалау күзеті өкілі Грегорио Де Фалькомен телефон арқылы сөйлескен жазбасы жарияланды. Әңгіме барысында жағалау күзетінің өкілі капитанға кемеге қайта оралып, эвакуацияны басқаруды талап еткен.

Скеттино кейін кеменің қатты қисайып кетуіне байланысты құтқару қайығына түскенін айтып ақталған. Алайда сот оны өз міндетін орындамады деп таныды.

2015 жылдың ақпанында Италия соты капитанды адамдардың өліміне себеп болу, кемені апатқа ұшырату және жолаушыларды қауіп жағдайында қалдыру баптары бойынша кінәлі деп танып, 16 жылға бас бостандығынан айырды. 2017 жылы Италияның жоғарғы соты бұл үкімді күшінде қалдырды.

Апатқа ұшыраған кеме екі жылдан астам уақыт жағалауда жатты

Апаттан кейін Costa Concordia лайнері Джильо аралының маңында бір қырымен жатып қалған. Кеме жанармайының теңізге төгілу қаупі экологиялық апатқа ұласуы мүмкін еді. Сондықтан мамандар алдымен жанармайды шығаруға кіріскен.

2013 жылдың қыркүйегінде кемені қайта тік қалыпқа келтіру операциясы басталды. Арнайы металл құрылымдар мен алып резервуарлардың көмегімен 19 сағатқа созылған күрделі жұмыс жүргізілді.

2014 жылдың шілдесінде лайнер Генуя портына сүйреп жеткізіліп, кейін металл сынықтарына бөлшектелді. Кемеде жоғалған соңғы жолаушының денесі сол жылдың қараша айында табылған.

Бұл апат теңіздегі қауіпсіздік талаптарын қайта қарауға себеп болды. Круиздік компаниялар жолаушыларға қауіпсіздік нұсқаулығын өткізуге, экипаждың төтенше жағдайға дайындығына және эвакуация тәртібіне ерекше назар аудара бастады.