Көптеген елді мекенге газ бен таза ауыз су жеткізіледі

Қазақстанда тұрғын үй-коммуналдық шаруашылығын дамытуға қомақты қаржы бөлініп, көптеген елді мекенге газ бен таза ауыз су жеткізіледі. Үкімет жыл соңына дейін нақты жобалардың бастапқы тізімін әзірлеуі керек. Бұл туралы Қасым-Жомарт Тоқаев Қазақстан халқына Жолдауында мәлімдеді, деп хабарлайды buginmedia.kz.

Президенттің айтуынша, жаңа бастама «Халықтық құрылыс» деп аталады. Бағдарлама елдегі инфрақұрылымды дамытуға, халықтың әл-ауқатын жақсартуға және ұлттық экономиканы жандандыруға бағытталған.

«Тұрғын үй-коммуналдық шаруашылығы саласына қомақты қаржы бөлінеді. Көптеген елді мекендерге газ және таза ауыз су тартылады. Үкімет жыл соңына дейін нақты жобалардың бастапқы тізімін әзірлейді. Бұл тізім барлық аймақты қамтуы керек», – деді мемлекет басшысы.

Қасым-Жомарт Тоқаев бұл бастаманың негізгі мақсаты ел игілігін арттыру екенін атап өтті.

«Біз халқымыздың артып отырған зор үмітіне лайық болуымыз қажет. Бұл жоспарымыз ел игілігін арттыруға арналып отыр, басқа астарлы ойымыз жоқ. Сондықтан осы үлкен құрылыс қозғалысына “Халықтық құрылыс” деген атау берсек, қарсылық болмас деп сенемін», – деді Президент.

Мемлекет басшысының сөзінше, бағдарлама халықтың тұрмыс сапасын жақсартып қана қоймай, кәсіпкерліктің дамуына және ұлттық экономиканың жандануына ықпал етеді.

«Халықтық құрылыс бағдарламасы азаматтардың әл-ауқатын арттыратын, кәсіпкерліктің өркендеуіне, дамуына, ұлттық экономиканы жандандыруға зор ықпал ететін төл тарихымыздағы ең үлкен инфрақұрылымдық жоба болмақ», – деді Қасым-Жомарт Тоқаев.

Президенттің айтуынша, ауқымды құрылыс жұмыстары жүз мыңдаған адамды жұмыспен қамтуға мүмкіндік береді. Бағдарламаның игілігін бүкіл халық, әсіресе, өскелең ұрпақ көреді деп күтіледі.

Жоба аясында тұрғын үй-коммуналдық инфрақұрылымды жаңғыртуға басымдық беріліп, елді мекендерді газбен және таза ауыз сумен қамту көзделген. Нақты жобалардың бастапқы тізімі жыл соңына дейін әзірленіп, Қазақстанның барлық өңірін қамтуы тиіс.