Астананың бес ауданында бүгін жарық өшіріледі

Бүгін, 23 қыркүйекте Астананың бес ауданында электр жарығы жоспарлы жөндеу жұмыстарына байланысты уақытша өшіріледі. Кейбір аудандарда жарық тоғыз сағатқа дейін болмайды. Бұл туралы «Астана-РЭК» мәлімдеді, деп хабарлайды buginmedia.kz.

Байқоңыр ауданында электр жарығы ең ұзақ уақытқа өшіріледі. Сағат 09:30-дан 18:00-ге дейін «Парасат», «Вишневый сад», «Связист», «Березка», «Экспресс», «Экспресс-2» және «Ивушка» тұрғын алаптарында жарық болмайды.

Сонымен қатар 09:00-ден 16:30-ға дейін Вячеславский және Қыранқия көшелерінде электр энергиясы уақытша тоқтатылады.

Есіл ауданында сағат 08:30-дан 16:00-ге дейін Шұбар тұрғын алабындағы бірқатар көшеде жарық өшеді. Бұл аумақта жөндеу жұмыстары 23-25 қыркүйек аралығында жүргізіледі. Сондай-ақ Түркістан көшесіндегі №8, 8/1 және 8/2 үйлері 08:30-дан 16:00-ге дейін жарықсыз қалады.

Нұра ауданында 08:30-дан 16:00-ге дейін Қараөткел тұрғын алабындағы Ақкербез, Ақжелен, Таңбалытас, Аягөз және Қазанат көшелерінде электр жарығы болмайды.

Алматы ауданында бірнеше аумақта жарық әртүрлі уақытта өшіріледі. Абылай хан даңғылындағы бірқатар үйде 08:00-ден 16:30-ға дейін, Оңтүстік-Шығыс тұрғын алабындағы көшелерде 09:00-ден 12:00-ге дейін, ал Ш. Құдайбердіұлы және І. Жансүгіров көшелеріндегі кей үйлерде 13:00-ден 16:30-ға дейін электр энергиясы болмайды.

Сарыарқа ауданында Тлендиев, Тұрлыбаев, Босбиік, Жайлыма және Сейдалин көшелерінде сағат 09:00-ден 11:00-ге дейін жарық өшіріледі.

Электр энергиясын беру жөндеу жұмыстары аяқталғаннан кейін қайта қалпына келтіріледі.