Қазақстанда 8 қыркүйекте бірқатар өңірде дауыл соғып, жаңбыр жауады
Астана, Алматы және Шымкентте күн жылы әрі ашық болғанымен, Қазақстанның басым бөлігінде ауа райы тұрақсыз болады. Бірқатар өңірде жаңбыр жауып, күн күркірейді, жел күшейеді. Бұл туралы «Қазгидромет» синоптиктері хабарлады.
Батыста дауыл мен қатты жел күтіледі
Атырау, Ақтөбе, Маңғыстау және Батыс Қазақстан облыстарында жаңбыр жауып, найзағай ойнайды. Кей жерлерде бұршақ пен дауыл болуы ықтимал.
Өңірлерде желдің екпіні 15-28 м/с-қа дейін жетеді. Батыс Қазақстанның солтүстігі мен шығысында, Атырау облысының оңтүстігінде және Маңғыстаудың солтүстік-батысында нөсер жаңбыр жаууы мүмкін.
Атырау, Орал және Ақтөбе қалаларында да жаңбыр жауып, жел күшейеді.
Солтүстікте тұман түседі
Қостанай, Ақмола, Қарағанды және Солтүстік Қазақстан облыстарында желдің жылдамдығы 15-20 м/с болады. Солтүстік Қазақстан облысының батысы мен оңтүстігінде жел екпіні 25 м/с-қа дейін күшеюі ықтимал.
Түнде және таңертең Солтүстік Қазақстан облысының оңтүстігінде тұман түседі. Петропавл, Көкшетау және Қостанай қалаларында жел күшейеді. Павлодар облысының шығысында да желдің жылдамдығы 15-18 м/с-қа жетеді.
Оңтүстікте ауа райы бірқалыпты
Оңтүстік өңірлерде жағдай салыстырмалы түрде тұрақты болады. Жетісу облысының таулы аудандарында және Қызылорда облысының батысында күндіз жаңбыр жауып, найзағай ойнауы мүмкін.
Түркістан облысының батысы мен солтүстігінде тұман түседі. Жамбыл және Түркістан облыстарында, сондай-ақ Алакөл маңында желдің екпіні 15-20 м/с-қа дейін жетеді. Түркістан қаласында жел жылдамдығы 20 м/с-қа дейін күшеюі ықтимал.
Өрт қаупі сақталады
Жаңбыр мен желге қарамастан, бірқатар өңірде өрт қаупі жоғары деңгейде қалады.
Өрт қаупі Алматы, Жамбыл, Түркістан, Қызылорда, Ұлытау, Атырау, Маңғыстау және Ақтөбе облыстарында, сондай-ақ Шымкент, Жезқазған, Атырау, Ақтөбе және Тараз қалаларында сақталады.