Каспийдің Қазақстан жағалауында жаңа арал пайда болды
Қазақстанның Каспий теңізі бөлігінде жаңа арал пайда болды. Оның қалыптасуына Каспий теңізі деңгейінің төмендеуі және судың тартылуы себеп болған.
Каспийде жаңа арал пайда болды: оған «Рыбачий» деген атау берілді
Маңғыстау облысының жағалауындағы Каспий теңізінде су деңгейінің төмендеуіне байланысты жаңа арал пайда болды. Ол Ақтау маңындағы Әулие аралынан шамамен 500 метр шығысқа қарай, Баутино ауылынан 30 шақырымдай жерде орналасқан.
Caspian Holiday компаниясының негізін қалаушы Ерболат Мұқашов Lada.kz-ке берген сұхбатында жаңа аралдың «Рыбачий» деп аталғанын айтты.
Оның мәліметінше, соңғы 4-5 жылда Каспийдің солтүстік бөлігінде теңіз суының шегінуінен өзге аралдардың маңында да жаңа құрлық аумақтары пайда болған. Олардың арасында Құлалы, Морской, Святой, Подгорный және Үшарал аралдары бар.
Мамандар жаңадан пайда болған «Рыбачий» аралына барып, оның аумағын әуеден түсіріп алған.
Аралда қандай жануарлар бар?
Мұқашовтың айтуынша, бұл аумақта негізінен қасқырлар мекендейді. Сондай-ақ жабайы қабандар мен борсықтар кездеседі. Жағалауға жақын жерде құстар мен балықтардың түрлі түрлері тіршілік етеді.
Каспийдің осы бөлігі Каспий итбалығы үшін де маңызды аймақ саналады.
Каспийдегі су деңгейі төмендеп барады
Жаңа аралдың пайда болуы Каспий теңізіндегі су деңгейінің бірнеше жылдан бері төмендеуімен байланысты. Бұл құбылыс әсіресе теңіздің таяз солтүстік бөлігінде, соның ішінде Қазақстан жағалауында анық байқалады.
1990 жылдардың ортасынан бері Каспийдің деңгейі шамамен үш метрге төмендеген. Соңғы жылдары су деңгейінің төмендеу қарқыны күшейіп, кейбір учаскелерде жағалау сызығы едәуір шегінген.
Ғалымдар Каспийдің тартылуына бірнеше фактор әсер ететінін айтады. Олардың қатарында теңізге құятын өзендердегі су көлемінің азаюы, климаттың өзгеруіне байланысты буланудың күшеюі және адам қызметінің әсері бар.