Қарағанды облысының әкіміне сөгіс жарияланды
Қарағанды облысының әкімі Ермағанбет Бөлекбаевқа сөгіс жарияланды, деп хабарлайды buginmedia.kz.
Бұл туралы Президенттің баспасөз хатшысы Берік Уәли хабарлады.
"Мемлекет басшысы Қасым-Жомарт Тоқаев жылыту маусымына дайындық жұмыстарына тиісінше бақылау жасамағаны үшін Қарағанды облысының әкімі Ермағанбет Бөлекбаевқа сөгіс берді", - деп жазды ол.
Естеріңізге салайық, қазан айының ортасында Қарағанды облысындағы Саран қаласы жылусыз отырғаны белгілі болды. Қаладағы орталықтандырылған жаңа қазандықтан ақау шыққан. Жаңа қазандыққа республикалық бюджеттен 9 млрд теңге бөлінген еді. Өңірдегі жағдайды бақылауға алу үшін энергетика министрі Алмасадам Сәтқалиев Саран қаласына барды. Арада үш аптадай уақыт өткенде Саран қаласына жылу берілді.
Артынша жылуға жауапты шенеуніктер жазаланды. Саран қаласының әкімі Еркін Баулықов басында қатаң сөгіс алып, кейін жылу беру маусымының басталуында олқылық жібергені үшін қызметінен босатылды.
Қарағанды облыстық энергетика және тұрғын үй-коммуналдық шаруашылығы басқармасының басшысы Тілектес Досаевқа қатаң сөгіс жарияланды, ал облыс әкімінің бірінші орынбасары Азамат Тайжановқа ескерту алды.
Айта кетері, Қарағанды облысында, соның ішінде Саран қаласында жылу беру маусымы 1 қазанда басталған.