Денсаулық сақтау министрлігінің хабарлауынша, Алматы қаласындағы №2 қалалық перинаталдық орталыққа жүктіліктің 35-аптасында қағанақ суы мерзімінен бұрын кеткен 40 жастағы жүкті әйел шұғыл жеткізілді.
Тексеру барысында дәрігерлер ұрықтың өміріне қауіп төндіретін қан айналымының бұзылуын анықтап, шұғыл кесарь тілігін жасауға шешім қабылдады.
Операция кезінде мамандар көлемі 20×25 сантиметр болатын алып миоманы анықтады. Жағдайдың күрделілігіне ішектің жатырға тығыз жабысып қалуы да себеп болған.
Дәрігерлердің үйлесімді жұмысының нәтижесінде нәресте аман-есен дүниеге келді. Сонымен қатар мамандар салмағы 5,1 келі болатын алып ісікті алып тастап, әйелдің жатырын және репродуктивтік функциясын сақтап қалды. Бұл оған болашақта тағы да ана атануға мүмкіндік береді.
"Операция нәтижесінде салмағы 2,2 келі болатын шала туған ұл бала дүниеге келді. Туғаннан кейін сәби біраз уақыт жаңа туған нәрестелердің реанимация бөлімшесі мамандарының бақылауында болып, дер кезінде көрсетілген медициналық көмектің арқасында жағдайы тұрақтанды", - делінген хабарламада.
Қазіргі уақытта ана мен баланың жағдайы жақсы. Дәрігерлер олардың денсаулығына қауіп жоқ екенін айтып, екеуін де үйлеріне шығарды.
