Жетісайда қой айдап кеткен ер адам із-түзсіз жоғалып кетті
Түркістан облысы Жетісай ауданында 38 жастағы Мақсат Атабаев 25 күннен бері табылмай жатыр, деп хабарлайды buginmedia.kz Orda.kz-ке сілтеме жасап.
Мақсат Атабаевтың анасы Бибісара Жәнібекованың айтуынша, жалғыз ұлы Шардараға қой айдап кетіп, сол күйі жоғалып кеткен. Ол соңғы рет анасымен 2 тамыз күні хәл-жай сұрасқан. Кейін Мақсаттан хабар үзілген. Бибісара Жәнібекова ұлын әлдекімдер күшпен құлдықта ұстап отыр деп күдіктенеді. Сонымен қатар бұл іске оның досының қатысы болуы мүмкін деп топшылайды.
«Күнде жолына қарап тілеп отырмын. Құдайдан үміті болса, жүрегінде иманы болса, кім ұстап отырса да, оның да бала-шағасы бар ғой, жіберсе қайтеді?!», — дейді Мақсаттың анасы.
Мақсат Атабаевтың тұрақты жұмысы болмаған. Шыққан жұмысты істеп, нәпақа тауып жүрген ол жалғыз анасымен бірге өмір сүрген.